قصة اجتماعية حسانية : فاصل فذراع بويا

قصة اجتماعية حسانية : فاصل فذراع بويا

الزوج : الو .. أنا اراني جاي  ف طريق اياك ما تحتاجي  شي نشريه وانا جاي ؟

الزوجة :منلا . ماخصنا شي الحمدلله

الزوج :  تمام .. ايو اراني مرگت من أرابوني مسافة طريق ونعود عندكم  .
اصنتي وجدي الغداء اراني ميت بيا جوع، كيفني مارگ من اجتماع وخاليني جوع!

الزوجة : ايو.انشاءلله

وفات المكالمة وطرحت موبلها ونسات ماگفلتو وخلاتو مفتوح.. .
سمع ملات خيمتو هي اولدو  سلامو  يتكلموا..!

سلامو : هو مالي اليوم ماسولو عني!!! ؟ ..

زوجة : سول بعد عنك  ياوني .. ودايمن يسولني عنك .....بوك يبغيك حتى ياسلامو ودايمن يسول عنك، ألا انا ننسى مانگولهالك!

سلامو: انا متأكد عنو ماسول عني ..!
هو لو كان يبغيني كان علمني الشطرنج .وانا دايمن نگولو علمني علمني  وهو ماهو باغي ..

"وكان بوه مزال يصنت فالموبل ويسمع االلي يگول ولدو .."

.فم وگف وتو🚘 كانو يسمع الحوار ويصنت لكلامهم بوضوح ...
سمع سلامو  يكمل كلامو ويگول لمو....

حاجلك الشطرنج  ذاك الي عطاوهلي في المدرسة العام الماضي يلين جبت الدرجة لولة على المدرسة..

حك واعي عليه

تمنيت عنو  يعلمني.وگلتهالو الا گام وعلمني حركتين وتوف  ..فم جاه تلفون وخلني وگيم عني ودايمن الا منين نگولهالو يگولي انا ماني صايب ،انا حاكمني رگاد.. انا متعب.. انا نشتغل وعذارو ياسرة و ماتوفا !
انت تعرفي شكون علمني شطرنج !!؟

شكون؟

جارنا بو صاحبي احمد ..
يلين  سمعني انحزر ولدو احمد كانو يعلمني گال لي تعال يلاه نعلمك انا ياولدي .وعلمني مسكين ،علمني بشور ويظحك معايا ولانطعن عليا ...
.
الزوجة: احدر  صوتك بوك اراهو لحگو يلحگ ...

""هذا كامل وهو مزال يصنت  !"""

سلامو : انا باغي نصارحك بشئ يا ماما

شنهو ياوليدي!؟

تعرفي عني يلين نگيس اهل صاحبي احمد .ويلين يجي بوه من عند للشغلة فرابوني يدفع شورو ويسلم على بوه و يذرعلو و يحبو من عند اراس ومن عند لوجه ويرفدو الفوگ ويتم مسكنو يظحك معاه؟ فم يرجع ويكمل لعبو معايا ..! كنت نحس عاني باغي نبكي ونگول فخلاگي شكم لو كان ذا بويا!! كنت حاسدو على بوه!

"هذي الكلمة باگات فيه حتى وهو گاعد فوتو"

الزوجة: ذرعت ال سلامو حتى وگالتلو انا اثري ماني دايمن نذرعلك يلين ادجي من المدرسة.. .. ..
فم اصا  اسمع الكلمة اللي باكتو و بگات فيه ..
وهو مزال گاعد فوتو 🚘 ..

گالها يغير ياماما .. "أنا فاصل الا فذراع بويا"..انا ندور الابويا يذرعلي ويحبني ويلعب معايا كيف بو احمد!

گالتلو  .. يا سلامو بوك يرجع من شغلة دايمن متعب
گالها .. نعرف نعرف نعرف ويجب  الخاصنا من المواد باش نوكلو ..ويجبنا لباس ويجبنا الفظة ويلين  يگعد  كانو يستراح يسكن تلفونو ويتلفن ولا يرگد ولاتعمرو اتاي وتتكلموا وحدكم!  وانا ماني في البرنامج!انا ماعندي حق عنو يلعبني ويظحكني ويرد عليا القصص كيف بو احمد!
انا صراحتا ماني حاس عنو بويا!
..
وفم  طلب سلامو  من امو موبلها كانو يلعب فيه سابگ الغدا .....

بلعجلة  اگفل ابو سلامو الموبل سابگ يفطن لو ..

فم ابدا   يخمم  ف كلام ولدو.
فم ابدا يراجع   علاقتو مع اهل بيتو.و يوخظ  الحظات كاملة الي مر بيها  ..
ويعاود  الكلام اللي  سمعو ظريك..
ويسول راسو  سؤال ويگول
كيفاش عادلي ذا من الزمن معا ولدي وماگطيت حبيتو ولا ذرعتلو  ولاسكنتو وللا لعبت معاه؟

ويگول راسو نحن الا سمعنا ابتنا و اجدادنا يگولو عنها فظاحة و عيب و لاهي من ارجلة و عدنا مهاجرين اولادنا ..!
اللمهم وخظ على بوتيگ فطريگو واشرى شطرنج جديد وغلفو ودارو كيف الهدية .
وسگم شور خيمتو   ..
ماهو عارف شلاهي يعدل وكيفاش لاهي يبدا
المسلة الوحيدة الي داير فراسو عنو خاصو يبدل من معاملتو معا ولدو ..
وگف وتو 🚘 گدام الحوش  وتم يبيبي بيببببببببب بيببب.. .بيببببببببببببببببب

جا سلامو  يجري هو لول ..

وجبر بوه واگف رافد  هدية .. ومتبسم تبسيمة عريظة وطويلة . سلامو ماگط شافها ولا يعرفها فبوه!

گالت الام بصوت مرفوع من داخل البيناي : هذا شكون يا سلامو    ؟؟

گالها : .. اراهو جا!

خرس سلامو الهدية وگال فنفسو  اكيد هذي الهدية ماهي لي وتلفت الورا و رجع  شور الخيمة ..!
بوه مزال واگف گدام الحوش
سمع ابوه يگولو  :
" تعال ذرعلي وني بولدي!!

جمد سلامو ف بلاصتو  .. وابدا يخرس كانو يتاكد من الكلمة
گالو  :نتا عينك عليانا  ..

گالو .. يهيه انت تعال ذرعلي .تعال ذرع البوك؟؟
جا دافع وگاس بوه وذراعلو وتم مذرعلو  .....
وتم يحبو من كل بلاصة وهو رافدو داخل بيه..
وكيفت حد اول مرة يجبرو  .. !

مرگت امو من الگوزينة  وهي تگول:
 تعالوا الغدا اراهو جاهز ...!

وگفت فبلاصتها مستغربة وهي تخرس زوجها رافد سلامو  ....ونصدمت من المنظر! وظحكت ونزلت منها زمعة دون قصد بيها زين المنظر!

وتم سلامو ساهي فذراع بوه يلين ارگد
وغمزها عنها توخر لغدا شوي
وتم مذرع الولدو يلين ارگد امالي هو معاه ...... ..
  اوعا سلامو ....
خرس بوه وهو مزال راگد .
وتكا تحت باطو وكمل ارگادو .
وعاشو حياة ثانيا بعيد عن سجن العادات والطبائع والأعراف المتبعة والخاطئة!

*انتبهوا الى  تصرفاتكم مع اولادكم ..*

لا تخلوهم يحسوا بالغيرة فبيوت أصحابهم ..
خلوهم  يعرفوا ويشعروا بدفءو بحبكم اللهم
بيهم لما جبروها عندكم لاهي يجبروها فشارع (وشارع مايربي )!

واللي لاهي يتعلموه فشارع لاهي يعود  ثمنو غالى وغالي حتى.. وأكيد انتما هما اللي لاهي  تدفعو  الفاتورة غالية وغالية حتى..

ولدك لما جبر راحتو فخيمة اهلو لاهي يلودلها عند اصحابو فشارع وشارع ظريك هو سوق المخدرات والتدخين وتعليم السرقة ويعلم تركة عن لگرايا ماهي مهمة ويعلهم عن السيبة وروق طفلات والارتباط بيهم اهم من الگرايا ،ويعلهم عن الوتات والموبل اخير من گرايت اللوح والمصحف!

حاول تعود اب صالح ، يلين يدخل الخيمة يكون عند أولاده عيد وفرحة ، حاول يعود العيد وفرحة يلين تدخل ماهو يلين تمرگ !

بو سلامو ومثالوا من الاباء الظالمين لاولادهم  القاسين عليهم  البخيلين عليهم، لماهم مهتمين بولادهم ولايظحكوا معاهم ولا يلعبوا معاهم طول نهار مكشر فوجاهم ولا يتكلم معاهم ولايجمع معاهم وعاطي مسااااااااحة كبيرة بينو وبينهم، اكيد لاهي يعود العيد وفرحة عند اولادو يغير للاسف العيد الا منين يمرگ عنهم  ،ألا باش  يمرگ من الخيمة يتنفس اولادو  الصُعَدَاء ، ويلين گاع يسافر ذيك هي أمنيتهم وطايحالهم من السماء ويعود اسعد الناس ، وتجبرو يلين يستكهل ويكبر فسن يعود وحدو مزروگ فالخيمة مامعاه حد بيه لي ربى اولادو عنهم يحترموه ولا يلعبو معاه ولا يطخكوا معاه

 "وعاشوا فصغرهم كارهينو وفكبرهم زارگينو! "
.
أنا عارف عن ياسر من  ابتنا كانت عندهم افظاحة حد  يحب ولا يرفد ولدو..وهذا جهل منهم ولاهو من سنة الرسول صلى الله عليه وسلم، الرسول كان يماري اتركة صغيرين ويحبهم ويسلم عليهم ويلعب مع الحسن والحسين! وعاش حياتو يسلم ويحب ابناء لمدينة المنورة وتركة كاملة تبغيه!

وديرو فروسكم عن سلامو وأبوه ما هي مجرد قصة عادية..!
سلامو موجود ف ياسر من  لبيوت!

.........النهاية........