قصة كوميدية : مدمنة روايات
انت مالك تبكي وني بيك!؟
مجدى مات يا احمد مجدى مات!!!
لا حول ولا قوة الا بالله يغير مجدى شكون!؟
مات بين ايديا حاولت نقذو وكل ما مرة يرجع يعيش ويتكلم يموت مني غصب عني انا هي اللى قتلته . انا اللي قتلته!
سمي يامنت ناس بشوري أهداي يغير فهميني مجدى هذا شكون!! اثرو قريبك!!؟
مجدى بطل الرواية اللى بدأت نكتبها عادلي نهارين!
تصدقي عنك امراة مجنونة وبلاصتك خاصها تعود في 12 اكتوبر!
هاااااه..... زين يا احمد انت عايد تسخر من مشاعرى واحاسيسي ولا ناك احاس بلي يحصل لأبطال رواياتي!!
يا لانا زاد مع ذو الروايات اللي لاهي يخسرو مخك ويخلو خويمتك!
آيه.. السلام عليكم انا مانسمحلك بذا ! بدل ما تواسينى وتوگف معايا ونحاولو نرجعو مجدي لحضان "بثينة" اللي مسيكينة ياوني مزروگة فى المستشفى عادلها 3 تيام
بثينة شكون مالي!!!
حبيبة مجدى اللي بوها ماكان موافق على خيمتها بيه، واتفقو عنهم ينتحرو وكل ما احاولت نخليه ينسى فكرة الأنتحار نجبرو مصمم عليها ،فات مات عليا لغاية ذي ساعة 8 مرات ياوني بيه وكل مرة ننقذو ونجبرلو مخرج يغير ذي المرة خلاص ماات مات عليا يااحمد!!
لا حول ولا قوة الا بالله طيب ياوني بيك ممكن تطرحيلي لغدا ارني ميت بجوع ،وللا لاهي نتموا معمرين وتوف اتاي ونترحموا على صديقك مجدى هذا و "بثينة" يلي لابينت فيهم ظو!
انت شطرا فيك يا احمد هو انت ماعندك احساس ولامشاعر مشي وغلي بيظة ولا ظل بلا غدا شخاسر عليك، انت مانك شايفنى فى ظروف ما تسمحلى عني نفكر فى أكل ولا شرب ولا نظافة!
يعنى عنك مانصبتي شي!
يا احمد انا الصراحة ماني لاهي نعرف نركز فى أى مسلة الا منين بثينة ترجع تعيش فى احضان مجدي من جديد والرواية تنتهى نهاية سعيدة...
يا مخلوقة الله بثينة شكون للي لاهي ترجع المجدي اللي فات مات فى ايدك انتى لوحدك 8 مرات، شاك عنو مزال لاهي يحيا ويعيش معها وانت مرمدة حياتو فذي رواية تجبريه ظريك طايرالو منك ومن روايتك وباغي يموت ويتهنا منك ومن بثينة!
حكلا لا تگول ذا يا احمد ارجوك لا تليت تتفائل لو شي شين انا منين مجدى يموت المرة الجايا انا والله ماتليت لاهي نسامح نفسى ابدا ، يغير لحمدلله الدكتور گال عن حالة بثينة مستقرة وقرببا لاهي تمرگ من المستشفى
حمدا يارب هذا ياسر من فضل ربي ،الحمدلله راعاكي اطمنتى على بثينة ،ايو گومي وني بيك اطرحيللنا شي نوكلوه!
و مجدى!
ملعون أبو مجدى يانلع بوه وبو ذاك ياختي كتلي جدو وتهناي ولا طيريه شور اي بلاصة، ياويلي ياذا مجدي للي مرفود همو وانا ميت من جوع!
مانلااااااا يانت مانك احمد اللى انا بغيتو ووعدنى عنو يتم معايا العمر كامل،وذا هو انت تتخلا عني مع اول مشكلة تواجهني !
يا وني بيك مغلاك هذي راهي اللا رواية يعنى قصة من تأليفك انت الخاص، يغير نگولك شي انتي ممكن تخلى الرواية رواية رعب وتخلي مجدى يموت راسو، ويمرگ من القبر عاگب ذاك كيف زومبى او مصاص دماء ويلبس بثينة ويسكن جسدها ويعيش معاها العمر كامل!!!
تصدق فكرة زينة حتا والله ، والله اللا تگد تعود مؤلف سينمائى!!
شوفتى حكلا عني نبغيك وقلبي معاك، ايو يلاه وني بيک گومي طرحيلي شي نوكلو مساريني دايگو من متن جوع وتخمام بمجدي وبثينة!
غدا اش حتا انت! انا لاهي نبدا من ظريك نكتب الرواية من جديد ونخمم في سيناريو زومبي وانت عارف الرعب يحتاج عنك تطفى الظو فى الكيكوطا كاملة باش تعيش مع الاحداث
وغداي !!
امشي گيس امك تغدا عندها، ولا گيس جارتنا امبيركة ارني شميت عندها گبيل ريحة اللوبيا للي گلت عنك تبغيها، يغير لا تبطا عندها!!! ولو تاخرت و رجعت البيت وجبرت شي يتحرك فى البيت او ريدوهات يطايرو او شي يطلع وشي يگظ من البيفا واللا الماريو وللا من تحت البطاجي ،عسك تخاف، ذيك اراهي اللا انا مندمجة شوي مع احداث الرواية .!
ياربي لا خبلتنا!!!
....عسك تتخيم واحدة مدمنة روايات
....اياك ثم اياك تتخيم ب مؤلفة روايات
فكر مليون مرة قبل ماترتبط بكاتبة روائية
ليست هناك تعليقات:
إرسال تعليق